“Goldman Sachs” bankının analitikləri ekstremal ssenariyə əsasən 2026-cı ilin sonuna qədər “Brent” markalı neftin qiymətinin bir barel üçün 40 dollardan aşağı düşə biləcəyini proqnozlaşdırırlar.
“PostMedia” xəbər verir ki, bu ssenari dünya ÜDM-in artımının yavaşlamasını və OPEC+ ölkələrinin hasilatın azaldılması tədbirlərindən tamamilə imtina etməsini nəzərdə tutur ki, bu da bazara neft tədarükünün artmasına səbəb olacaq.
Bankın əsas proqnozuna görə, 2025-ci ilin dekabrında “Brent” neftinin qiyməti bir barel üçün 58 dollar, növbəti ilin sonuna isə 55 dollar olacaq.
Bu ssenari ABŞ-də tipik bir resessiyanın inkişafını və OPEC+ ölkələrinin bazara neft tədarükü ilə bağlı əsas gözləntilərinin qorunmasını nəzərdə tutur. “Goldman Sachs” ekspertləri növbəti 12 ay ərzində ABŞ-də resessiya ehtimalını 45% olaraq qiymətləndirirlər.
Son həftələrdə dünya neft bazarı ABŞ prezidenti Donald Trampın ticarət müharibəsini gərginləşdirməsi və bəzi digər ölkələrin, o cümlədən Çinin cavab tədbirləri nəticəsində sarsıntılar yaşayıb.
Donald Tramp aprelin 5-dən etibarən 185 ölkəyə qarşı 50%-ə qədər ticarət rüsumları tətbiq edib və bunu ABŞ iqtisadiyyatını bərpa etmək zərurəti ilə əsaslandırıb. Çin üçün rüsumların həcmi 34% təşkil edib, lakin əvvəlki tədbirləri nəzərə alaraq bu rəqəm 54%-ə çatıb. Pekin, ABŞ-dən idxala əlavə 34% rüsum tətbiq edərək cavab verib və bu rüsumlar 10 aprel tarixindən qüvvəyə minəcək.
Bundan əlavə, OPEC+ ölkələri uzun müddət tədarükləri məhdudlaşdırdıqdan sonra bazara əvvəlcədən gözləniləndən daha böyük həcmdə neft qaytarmağı planlaşdırdıqlarını elan ediblər. Ən böyük neft istehsalçıları may ayından etibarən hasilat kvotalarını gündəlik 411 min barel artıracaq ki, bu da əvvəlki gündəlik 135 min barel artım planından üç dəfə çoxdur.
2025-ci ilin aprelindən etibarən alyans üzvləri hasilatı artırmağa başlayıblar ki, 2026-cı ilin sentyabrına qədər bazara gündəlik 2,5 milyon barel neft qaytarsınlar.
Ötən gün “Brent” neftinin qiyməti dörd il ərzində ilk dəfə bir barel üçün 63 dollardan aşağı düşüb, lakin sonra itkilərin bir hissəsini bərpa edib. Bu gün isə London ICE birjasında “Brent” neftinin iyun fyuçerslərinin qiyməti 0,2% artaraq Moskva vaxtı ilə 14:50-də bir barel üçün 64,3 dollara çatıb.
Sizin reklamınız burada ola bilər