Su qaynayıb soyuyandan sonra bir daha qızdırmaq üçün çaydanın düyməsinə basmağımız gündəlik həyatın adi hissəsidir. Amma bu mövzuda o qədər söhbət gəzər ki, adam istər-istəməz düşünür: görəsən, suyu bir neçə dəfə qaynatmaq təhlükəlidirmi? Gəlin bu məsələyə aydınlıq gətirək və miflərlə həqiqəti bir-birindən ayıraq.
Ən məşhur mif: çaydanın içində zəhər?
Ən geniş yayılmış qorxu ondan ibarətdir ki, guya hər təkr(ar qaynama zamanı sudakı zərərli maddələrin konsentrasiyası artır və nəticədə su zəhərə çevrilir. Amma əslində, qaynama prosesi özü heç bir zəhər yaratmır. Əgər su əvvəlcədən təmiz və təhlükəsizdirsə, təkrar qızdırmaq onun tərkibini sağlamlıq üçün təhlükəli hala gətirmir. Əlbəttə, buxarlanma nəticəsində mineralların konsentrasiyası bir qədər arta bilər, lakin bu artım insan sağlamlığı üçün təhlükəli səviyyədə deyil.
Təkrar qaynatma zamanı nə dəyişir?
Ən nəzərəçarpacaq dəyişiklik – çöküntü əmələ gəlməsidir. Çaydanın divarlarında və isidici elementlərində görünən ağ izlər kalsium və maqnezium duzlarının çökməsidir. Bu duzlar sağlamlıq üçün təhlükəli deyil, lakin:
Çaydanın effektivliyini azaldır: çöküntü səbəbindən su daha yavaş qızır və daha çox elektrik və ya qaz sərf olunur.
Suyun dadını korlaya bilər: Çöküntü suya xoşagəlməz dad verə bilər.
Nə zaman diqqətli olmaq lazımdır?
Əgər istifadə etdiyiniz su quyu, açıq su hövzəsi və ya digər yoxlanmamış mənbədəndirsə, orada olan bəzi maddələrin konsentrasiyası həqiqətən də hər qaynama zamanı bir qədər arta bilər. Bu hallarda təmizlənmiş və ya butulka suyu istifadə etmək tövsiyə olunur.
Suyu neçə dəfə qaynatmaq olar? Mütəxəssislərin cavabı
Əgər su təmizdirsə, onu heç bir ziyanı yoxdur. Yeganə mənfi cəhət — çöküntünün yaranması və dadın dəyişməsidir, vəssalam.
Maraqlı faktlar (miflərsiz)
Bəzi ölkələrdə, xüsusilə də suyu sərt olan yerlərdə, insanlar suyumşaldıcı filtrdən istifadə edirlər ki, bu da çöküntünün qarşısını alır.
Müxtəlif çay və qəhvə növləri üçün ideal su temperaturu fərqlidir. Məsələn, yaşıl çay üçün 80°C kifayətdir, suyu hər dəfə qaynatmağa ehtiyac olmur.
Çaydanı vaxtaşırı sirkə və ya xüsusi vasitələrlə təmizləmək onun ömrünü uzadır və suyun dadını qoruyur.
Nəticə: Suyu bir neçə dəfə qaynatmaqdan çəkinməyə ehtiyac yoxdur. Əsas odur ki, çaydan təmiz olsun və istifadə etdiyiniz su keyfiyyətli olsun.
Sizin reklamınız burada ola bilər