İran, ABŞ ilə davam edən danışıqlarda hərtərəfli nüvə razılaşmasına keçmədən əvvəl müvəqqəti bir sazişin əldə olunmasını təklif etməyi nəzərdən keçirir.
"PostMedia" xəbər verir ki, bu barədə "Axios" a məlumatlı mənbə bildirib.
Məlumata əsasən, bu addım iki ölkə arasında gərginliyi azaltmaq və zaman qazanmaq məqsədi daşıyır. Prezident Donald Tramp İranla yeni nüvə razılaşması üçün iki aylıq müddət təyin edib və bu müddət ərzində diplomatiya uğursuz olarsa, hərbi müdaxiləni istisna etmir.
Tramp bu həftə açıqlamasında, əgər razılaşma əldə olunmazsa, ABŞ-nin və ya İsrailin İranın nüvə obyektlərinə hərbi zərbə endirə biləcəyini bildirib.
İran tərəfi isə bu cür təzyiqlərin nəticəsində BMT müfəttişlərini ölkədən çıxara və zənginləşdirilmiş uranı gizli yerlərə köçürə biləcəyini bəyan edib.
Müvəqqəti razılaşma çərçivəsində İranın 60%-lik uran ehtiyatını seyrəltməsi, zənginləşdirməni məhdudlaşdırması və BMT-nin daha geniş nəzarətinə imkan yaratması nəzərdə tutulur. Lakin bu addımlar İranın nüvə silahı əldə etmə müddətini cüzi şəkildə uzada bilər.
Bununla yanaşı, İran Trampın "maksimum təzyiq" siyasətinə son qoymasını tələb edə bilər. Lakin Tramp administrasiyası bu həftə İranın nüvə və enerji sektoruna qarşı yeni sanksiyalar tətbiq edib və bu da qarşılıqlı inamsızlığı dərinləşdirir.
Danışıqların növbəti mərhələsi bu şənbə günü Oman vasitəçiliyi ilə keçiriləcək görüşdə davam etdiriləcək. ABŞ nümayəndəsi Stiv Vitkoff və İranın xarici işlər naziri Abbas Əraqçi bu danışıqlarda iştirak edəcək.
Sizin reklamınız burada ola bilər